🌿🍀🌿🍀🌿🍀🌿
ଲାଜକୁଳୀ ଲତା ହେଲେବି ବୃକ୍ଷଟେ
ଜାଣଇ ନୀତି ସଂସ୍କାର
ଆସିଲେ ତା ଦେହ ସଂସ୍ପର୍ଶରେ କେହି
ଘୋଡା଼ଏ ଅଙ୍ଗକୁ ତାର ।
ଧର୍ମ ତା ନଇଁବା କଷଣ ସହିବା
ଦଳି ଚକଟି ଦେ ଯେତେ
ଦଣ୍ଡା କି ବାଳୁଙ୍ଗା ନୁହେଁ ତା ସ୍ଵଭାଵ
ସରମୀ ଲତାଟି ସତେ ।
ଜାଣେ ସେ ଦୁନିଆ ବଡ଼ ଅମାନିଆ
କରନ୍ତି ଖାଲି ଶୋଷଣ
ହୋଇ ଭୟଭୀତ ହୁଏ ସଙ୍କୁଚିତ
ଲଜ୍ୟା ଅଟେ ତା ଭୂଷଣ ।
ବନାନୀ ସବୁଜ କ୍ଷେତରେ ଶୋଭିତ
ଥାଏ କୋଣେ ଅନୁକୋଣେ
ପ୍ରକୃତି କୋଳରେ ବଂଶ ତା ବିସ୍ତାରେ
ଘଞ୍ଚ ଅରଣ୍ୟର ବଣେ ।
ନିଦାଘ ଖରାରେ ମାଟିର ଗନ୍ଧରେ
ଶରୀର ବିଛୁଡ଼ି ଥାଏ
ପାଇଲେ ବରଷା ଜଳକୁ ଗ୍ରହଣେ
ବହୁ ଆନନ୍ଦିତ ହୁଏ ।
ସରୁ ସରୁ ପତ୍ର ଚାଦର ବିଛାଇ
ଖେଳି ଯାଉଥାଏ ମନେ
ପବନର ମିଠା ପରଶ ପାଇଲେ
ଜୀବନକୁ ଧନ୍ୟ ମଣେ ।
ସୁରକ୍ଷିତ ହୋଇ ରହିବା ପାଇଁକି
ଦେହରେ ତା କଣ୍ଟା ଭରି
ଗଢ଼ିଛି ବିଧାତା ରୂପ ରେଖ ଦେଇ
ତାକୁ ସୁକୁମାରୀ କରି ।
ନାରୀ ର ଭୂଷଣ ଲଜ୍ୟାଟିକୁ ଜାଣ
ଦେହରେ ସେ ଅଳଙ୍କାର
ଲାଜକୁଳୀ ଲତାଠାରୁ ଶିକ୍ଷା କର
ବଞ୍ଚିବାର ସୂତ୍ରଧାର ।
ମାନବ ଜାତି ହେ ଛାଡ଼ କୁସଂସ୍କାର
ହୁଅ ଟିକେ ସ୍ୱାଭିମାନି
ଭାରତୀୟ ପ୍ରଥା ପ୍ରାଚୀନ ସଂସ୍କୃତି
ବଜାୟ ରଖୁଥା ମାନି ।
. ସମାପ୍ତ
💌 ଯାଜପୁର,ମଙ୍ଗଳପୁର,କୟାଁ
No comments:
Post a Comment