ଜୟ ଜୟା ରାମଚନ୍ଦ୍ର କୌଶଲ୍ୟା ନନ୍ଦନ ।
ଜୟ ଜୟ ରଘୁନାଥ ରାଜୀବ ଲୋଚନ ॥(୧)
ଦଶରଥ ସୁତ ଆହେ ପ୍ରଭୁ ଦାଶରଥୀ ।
ସୂର୍ଯ୍ୟବଂଶେ ଜାତ ହୋଇ ରଖିଅଛ ଖ୍ୟାତି ॥(୨)
ତାଡକା ବଧ କରିଣ ଯଜ୍ଞ ରକ୍ଷା କଲ ।
ବିଶ୍ଵାମିତ୍ର ସଙ୍ଗତରେ ମିଥିଳା ଗମିଲ ॥(୩)
ଜାନକୀ ସ୍ଵୟମ୍ବରରେ ଧନୁର୍ଭଗ୍ନ କଲ ।
ବିବାହ କରି ସୀତାଙ୍କୁ ସ୍ଵଦେଶ ଫେରିଲ॥(୪)
ପିତୃ ସତ୍ୟ ପାଳି ପୁଣି ବନସ୍ତେ ଗମିଲ ।
ଅନୁଜ ଭରତକୁ ହେ ରାଜ୍ୟ ସମର୍ପିଲ ॥(୫)
ପଞ୍ଚବଟୀରେ କୁଟୀର କରିଲ ନିର୍ମାଣ ।
ଭାଇ,ଭାରିଜା ସଙ୍ଗତେ ବିତାଇଲ ଦିନ ॥(୬)
କନ୍ଦମୂଳ କଞ୍ଚାଫଳ ସେବି ପ୍ରତି ଦିନ ।
ସୂର୍ପଣଖା ନାସା,କର୍ଣ୍ଣ ଛେଦିଲେ ଲକ୍ଷ୍ମଣ ॥(୭)
ମାୟା ମିରିଗ ଛଳରେ ପେଷିଲା ରାବଣ ।
ମୋହାବେଶ ହେଲେ ସୀତା ମୃଗକୁ ଦେଖିଣ ॥(୮)
ଅନୁରୋଧ ରକ୍ଷା କରି ବଧିଲେ ଆପଣ ।
ତ୍ରାହି ଲକ୍ଷ୍ମଣ ଶବଦେ ଡାକିଲା ହରିଣ ॥(୯)
ସୀତୟା ଉଚ୍ଛନ ହୋଇ କରିଲେ କ୍ରନ୍ଦନ ।
ଏକାନ୍ତ ଛାଡି ଗମିଲେ ସେ ବୀର ଲକ୍ଷ୍ମଣ ॥(୧୦)
ଯତି ବେଷେ ପ୍ରବେଶିଲା ଦନୁଜ ରାବଣ ।
ସାଧ୍ଵୀ ସୀତା,ଭିକ୍ଷା ମାଗି କରିଲା ହରଣ ॥(୧୧)
ସୀତାଙ୍କୁ ନପାଇ ପ୍ରଭୁ ହେଲେ ମ୍ରିୟମାଣ ।
ଜଟାୟୂ ସନ୍ଧାନ ଦେଲା ଲଙ୍କାର ରାବଣ॥(୧୨)
ଖୋଜି ଖୋଜି ବନ ଗିରି ଆତୁରେ ରୋଦନ ।
ବାଟରେ ଭେଟିଲେ ଭକ୍ତ ବୀର ହନୁମାନ ॥(୧୩)
ସୁଗ୍ରୀବ ସଙ୍ଗତେ ମିତ୍ର ବାନ୍ଧିଲେ ଆପଣ ।
କିଷ୍କିନ୍ଧ୍ୟାର ଅଧିପତି ବାଳିକୁ ବଧିଣ ॥(୧୪)
ସୁଗ୍ରୀବକୁ ରାଜା କରି ରଖିଲ ସମ୍ମାନ ।
ବାନର ମେଳରେ ଲଙ୍କା କଲ ଅଭିଯାନ ॥(୧୫)
ସୀତା ଠାବ କରି ହନୁ ସ୍ଵର୍ଣ୍ଣ ଲଙ୍କା ଧ୍ଵଂସ ।
ମୁଦ୍ରିକା ପ୍ରଦାନକରି ଆଣିଲା ସନ୍ଦେଶ ॥(୧୬)
ବାରମ୍ବାର ବୁଝାଇଲା ଭାଇ ବିଭୀଷଣ ।
ଅଗତ୍ୟା ହୋଇ ଶେଷରେ ପଶିଲା ଶରଣ ॥(୧୭)
କୁମ୍ଭକର୍ଣ୍ଣ, ଇନ୍ଦ୍ରଜିତ ରାକ୍ଷସ କୁ ମାରି ।
ସ୍ଵର୍ଣ୍ଣଲଙ୍କା,ସବାନ୍ଧବ ଶୂନ୍ୟ ହେଲା ଶିରୀ ॥(୧୮)
ଅହଙ୍କାରୀ ଦଶାନନ ପାପୀକୁ ସଂହାରୀ ।
ବିପଦୁ ଉଦ୍ଧାର କଲ ଜନକ କୁମାରୀ ॥(୧୯)
ଆହେ ପ୍ରଭୁ କୃପାସିନ୍ଧୁ ମୋପାପ ମୋଚନ ।
ଅଜ୍ଞାନ ଏ ଦୀନ ହୀନ କରୁଛି ଜଣାଣ ॥(୨୦)
ଅଜିତ କୁମାର ତ୍ରିପାଠୀ (ଶିକ୍ଷକ)
ଗ୍ରାମ/ ପୋଷ୍ଟ - କୁଲାଡ଼, ଭଞ୍ଜଭୂମି
ଭଞ୍ଜନଗର, ଗଞ୍ଜାମ- ୭୬୧୧୩୧
No comments:
Post a Comment