ଏକ ଦିନେ ନାରଦ ଯେ
ନାରାୟଣ ପାଶେ,
ଭ୍ରମି ଭ୍ରମି ପହଞ୍ଚିଲେ
ମନ ତ ବିରସେ I
ନାରାୟଣ ନାରାୟଣ
ଶବ୍ଦର ଝଙ୍କାରେ ,
ନାରାୟଣ ନିଦ୍ରା ଭାଜେ
ଓଷ୍ଠେ ହସ ଧାରେ I
ଲକ୍ଷ୍ମୀକାନ୍ତ ପ୍ରବୋଧିଲେ
ବ୍ରହ୍ମାଙ୍କ କୁମରେ ,
କୁହହେ ଦେବର୍ଷି କିବା
ବିଷାଦ ମନରେ I
ନାରଦ ଉବାଚ
ନାରଦ ବୋଲନ୍ତି ଶୁଣ
ଜଗତ ଠାକୁର,
ଭ୍ରମଣରେ ଯାଇଥିଲି
ଉତ୍କଳ ପ୍ରାନ୍ତର I
ଯାହା କିଛି ନୟନରେ
ଦେଖି ମୁଁ ଆସିଛି,
ତବ ଆଜ୍ଞା ହେଲେ ଆଗେ
ଭାଷିବି ଭାବୁଛି I
ଲୀଳାମୟ କି କାରଣେ
ଲଗାଇଛ ନାଟ,
ଓଡ଼ିଶା ମାଟିରେ ବୁଣା
ବୀଜ ଯେ ବିଭ୍ରାଟ I
କଳା ଠାକୁରଙ୍କ ଲୀଳା
ଦେଖିବାର ପାଇଁ,
ଶ୍ରୀକ୍ଷେତ୍ର ଧାମକୁ ଧାଇଁ
ଗଲି ହେ ଗୋସାଇଁ I
ବ୍ରହ୍ମର ବିଭ୍ରାଟ ପୁଣି
ଦାରୁର ବିଭ୍ରାଟ,
ଆନନ୍ଦ ବଜାରେ ପୁଣି
ଅବଢା ବିଭ୍ରାଟ I
ରତ୍ନ ଭଣ୍ଡାରର ଚାବି
ରହସ୍ୟ ବିଭ୍ରାଟ,
ଭକ୍ତ ସେବାୟତ ମଧ୍ୟେ
ନିତ୍ୟ ମାରପିଟ I
ଜମିଜମା ଯାହାଥିଲା
ତୁମରି ନାମରେ,
ପାନ୍ଥଶାଳା ବେଶ୍ୟାପଡ଼ା
ତାହାରି ଉପରେ I
ସ୍ଵର୍ଗଦ୍ଵାର ଚାରିପଟେ
ଅଟ୍ଟାଳିକା କେତେ,
ମଦ ମାଂସ ଭାସୁଅଛି
ଯାହାକୁ ତ ଯେତେ I
କି କହିବି ପ୍ରଭୁ ଆଉ
ମହୋଦଧି କଥା,
ସନ୍ତର୍ପଣେ ଚାଲୁଥିଲି
ସମ୍ଭାଳି ପଇତା I
ସେଠୁ ଚାଲି ଗଲି ପ୍ରଭୁ
ଏକାମ୍ର କ୍ଷେତ୍ରକୁ,
ଦର୍ଶନ କରିବା ପାଇଁ
ଶିବ ଠାକୁରଙ୍କୁ I
ବିଭ୍ରାଟ ତ ଛାଡି ନାହିଁ
ସେହି କ୍ଷେତ୍ର ପିଛା,
ମାନବେ ଟାଣି ଦିଅନ୍ତି
ଈଶ୍ଵରଙ୍କ କଛା I
ସେଠାବାରୁ ଅତି ଶୀଘ୍ର
ଗଲି ଯେ ପଳାଇ,
ନେତା, ମନ୍ତ୍ରୀ, ସଚିବଙ୍କ
ଦରଶନ ପାଇଁ I
ସେ ମାଟିରେ ପାଦ ଦେଇ
ହୋଇଗଲି କାଠ,
ତାଳୁରୁ ତଳିପା ଯାଏଁ
ସବୁଠି ବିଭ୍ରାଟ I
ଡାଲି ପାଣି ଖଣି ପୁଣି
ବିଭ୍ରାଟର ଘର,
ସରକାରୀ ଜମି ସବୁ
ପୁଞ୍ଜିପତିଙ୍କର I
ଔଷଧରୁ ଶିଶୁ ଖାଦ୍ୟ
ସବୁଠି ବିଭ୍ରାଟ,
ଟଙ୍କାରେ ଚାଉଳ ସହ
କାଳିଆର ନାଟ I
କେନ୍ଦ୍ର ରାଜ୍ୟ ଏଠି ପୁଣି
ଦୋଷ ଲଦାଲଦି ,
ମୁହେଁ ତୁଣ୍ଡି ବାନ୍ଧିଥାନ୍ତି
ବିଚରା ବିରୋଧୀ I
ଏବେ ପୁଣି ବିଶୋଧକ
ମାସ୍କ ବିଭ୍ରାଟରେ ,
କାଦୁଅ ଯେ ଛଟାଛଟି
ଚାଲେ ପରସ୍ପରେ I
ରାଜ ଭବନରୁ ପ୍ରଭୁ
ମନ ଛାଡିଗଲା ,
କାବ୍ୟ କବିତା ପଟକୁ
ମନ ଯେ ଢଳିଲା I
କବି ସୂର୍ଯ୍ୟ ଭଞ୍ଜ କଥା
ସ୍ମରଣ ହୋଇଲା,
ରେଶମ ସହର ଦିଗେ
ଯାନ ଯେ ଚଳିଲା I
ଭେଣ୍ଡିଆ ଟୋକାଏ ଧରି
ଝୁଲାକୁ ଗଣ୍ଠିଲି,
ସ୍ତ୍ରୀ ପିଲା ସହ ଗାଡ଼ି
ହୋଇଛି ଗହଳି I
ପଚାରି ବୁଝିଲି ସବୁ
ଦାଦନ ଶ୍ରମିକ,
ବିଦେଶକୁ ଯାଉଛନ୍ତି
ମାରିବାକୁ ଭୋକ I
ଏ ମାଟିରେ ଜନ୍ମିଛନ୍ତି
କେତେ ମନ୍ତ୍ରୀ ନେତା,
ମୁଖ୍ୟମନ୍ତ୍ରୀ ଏହି ଜିଲ୍ଲା
ଭାଗ୍ୟର ବିଧାତା I
ତଥାପି ପ୍ରଭୁ ହେ ଦେଖି
ଏହି ଜିଲ୍ଲା ଦଶା,
ଆଉ କି ଭ୍ରମିବି ମୋର
ଉଡିଗଲା ହଂସା I
ବିଭ୍ରାଟ ହେବା ଆଗରୁ
ଚାଲି ମୁଁ ଆସିଲି ,
ତୁମରି ଦୟାରୁ ମୋର
ପ୍ରାଣ ବଞ୍ଚାଇଲି I
ଯଦି କେବେ ପ୍ରଭୁଙ୍କର
ପୁଣି ଆଜ୍ଞା ହେବ,
ତିରିଶ ଜିଲ୍ଲା ବିଭ୍ରାଟ
ନାରଦ ଭାଷିବ I
ଆଶ୍ରା ଦିଅ ଚରଣରେ
ହେ କରୁଣା ସିନ୍ଧୁ,
ଦୟା ସ୍ରୋତେ ହଜିଯିବ
ଏ ଶିଶିର ବିନ୍ଦୁ I
ଗାଙ୍ଗପୁର
ଗଞ୍ଜାମ-761123
No comments:
Post a Comment