🌿🌸 " ବଣ ମଲ୍ଲୀ " 🌸🌿

                 ✍ ଅମରନାଥ ବାରିକ୍

                କରିଦିଅ ପ୍ରଭୁ ଦୁବ ଘାସଟିଏ
                ତୁମ ଶ୍ରୀଅଙ୍ଗକୁ ସାଉଁଳେଇବି
               ପଡିଗଲେ ଧୂଳି ଝାଡ଼ିଦେବି ସବୁ
              ପାଖେ ପାଖେ ତୁମ ସେବା କରିବି ।
              କୋମଳ ପାଦକୁ ରହିବି ଆବୋରି
                ଦେବିନାହିଁ କେବେ ମଇଳା କରି
               ନୀତି ଚୁମିବି ମୁଁ ସେ ରଙ୍ଗ ପୟର
                 ରଖିଥିବି ସଦା ଆଦର କରି ।
              ଲୋଡା ନାହିଁ ମୋର ଏ ହୀନ ଜନମ
                ଶିରିକ୍ଷେତ୍ର ଯଦି ନପାରେ ଦେଖି
               ବଣ ମଲ୍ଲୀ ହୋଇ ବଣରେ ରହିଲି
               କେହି ଜଣେ ମାଳି ପାରୁନି ଦେଖି ।
                ନାହିଁ ପ୍ରୟୋଜନ ଏମିତି ଜନମ
                   ଯଦି ନ ଲାଗିଲି ତୁମରି ପାଇଁ
                ଫୁଟିବିନି ଆଉ ନୀତି ମୁଁ ସଞ୍ଜରେ
                 ବାସି ହେବି ନାହିଁ ତୁମକୁ ଚାହିଁ ।
               କି ଦୋଷ କରିଛି କାଳିଆ ସାଆନ୍ତେ
                    ତୁମ ମନ୍ଦିରକୁ ପାରେନି ଯାଇ
                ବଣରେ ଫୁଟି ମୁଁ ବଣରେ ମଉଳେ
                  ତୁମ ଦରଶନ ଭାଗ୍ୟରେ ନାହିଁ ।
                 ବଣ ମଲ୍ଲୀ କରି ବଣରେ ରଖିଲ
                   ପାରିଲିନି ତୁମ ପାଦକୁ ଛୁଇଁ
                 ଦେହରେ ଭରିଲ ସୁବାସ ଚହଟ
                   ତୁମ ପୂଜା ପାଇଁ ଲାଗିଲି ନାହିଁ ।
               ଇଚ୍ଛା ମୋ ଅନେକ ଦେଖିଲେ ତୁମକୁ
                 ସାର୍ଥକ ଫୁଲଟେ ହୋଇବି ବୋଲି
                 ଚାହୁଁଛି ତୁମର ପୂଜାରେ ଲାଗିବି
                 ସଭିଏଁ କହିବେ ଶ୍ରୀକ୍ଷେତ୍ର ମଲ୍ଲୀ ।
                 ବଣ ମଲ୍ଲୀ କହି ଅନେକ କବିତା
                  ଲେଖି ଚାଲୁଛନ୍ତି କଲମେ କବି
                  ପାର ପାଇଯିବି ଏହି ଜନମରୁ
                  ତୁମରି କରୁଣା ଯଦି ପାଇବି ।

.                             ସମାପ୍ତ

        ____●◆●____

✍ ଅମରନାଥ ବାରିକ୍
💌 କୟାଁ,ମଙ୍ଗଳପୁର, ଯାଜପୁର