ଜହ୍ନ

✍ବାସନ୍ତୀ ଲତା ଜେନା

ସୂର୍ଯ୍ୟ ଠାରୁ ଜହ୍ନ ଆଲୋକିତ ହୁଏ 

      ସ୍ୱଚ୍ଛତା ପରଶ ଦେଇ 

ଶୁଭ୍ର ଜ୍ୟୋଛନାରେ ଘଡ଼ିଏ ବସିଲେ 

      ମନ ଖୁସି ହେଉ ଥାଇ   l୧l

ଚନ୍ଦ୍ର ଉପଗ୍ରହ ପୃଥିବୀର ଅଟେ 

       ବୈଜ୍ଞାନିକ କହୁ ଥାଏ 

ଜହ୍ନକୁ ନେଇ କେତେ କାବ୍ୟ କବିତା 

       ରଚନା ଯେ ହେଉ ଥାଏ   l୨l

ମା' କୋଳରେ ଥାଇ ଶିଶୁ ଜହ୍ନ ଦେଖେ 

      କହନ୍ତି ଶରଦ ଶଶୀ 

ଆ ଜହ୍ନ ମାମୁଁ ମୋ କୁନା ପାଖକୁ 

      ତା ସାଥେ ଖେଳିବୁ ବସି   l୩l 

ପୂର୍ଣ୍ଣିମାର ଜହ୍ନ ସବୁଠୁ ନିଆରା 

       କୁଆଁର ପୁନେଇ ଦିନ 

କୁଆଁରୀ ଝିଅ ଯେ ବ୍ରତ କରି ଥାନ୍ତି 

      କରନ୍ତି ଜହ୍ନ ବନ୍ଦନ        l୪l

କଇଁ ଫୁଲରେ ତ ରଥ ସଜାଅନ୍ତି 

     କଇଁ ଫୁଲେ ଚାନ୍ଦ ଘର 

କୁଆଁର ପୁନେଇ ଗୀତ ବୋଲି ଥାନ୍ତି 

     ଆଶା ଚନ୍ଦ୍ର ପରି ବର       l୫l 

ଯୁଗେ ଯୁଗେ ଅଛି କଇଁ ଚାନ୍ଦ କଥା 

     ଅତୁଟ ପ୍ରେମ କାହାଣୀ 

ଯୁବକ ଯୁବତୀ ଜ୍ୟୋତ୍ସ୍ନାରେ ଭିଜନ୍ତି 

     ହୁ'ନ୍ତି ପ୍ରେମ ପୂଜାରିଣୀ    l୬l

ଜହ୍ନ କଳଙ୍କିତ ତଥାପି ସୁନ୍ଦର 

      ଜହ୍ନ ମାମୁଁ ସବୁଙ୍କର 

ଶୁକ୍ଳ ପକ୍ଷ ଆସେ ଜହ୍ନକୁ ନେଇ 

      ଶୀତଳ ଜ୍ୟୋଛନା ତାର    l୭l

ରକେଟରେ ଚଢି ଜହ୍ନକୁ ଯାଆନ୍ତି 

    ପିଲାଏ ଗାଆଁନ୍ତି ଗୀତ 

ମହାକାଶ ଜାନ ମହାକାଶେ ଯାଏ 

     ପରୀକ୍ଷଣ ହୁଏ ସତ      l୮l

ତାମସାର ରାତି ଆଲୋକିତ ହୁଏ 

      ଜହ୍ନର ପରଶ ପାଇ 

ଜହ୍ନ ଆଲୁଅରେ ସାଗର ଫୁଲଇ 

     ପୂର୍ଣ୍ଣିମା ଚାନ୍ଦକୁ ପାଇ    l୯l

ପୂର୍ଣ୍ଣିମାର ଜହ୍ନ ହାତେ ଧରିବାକୁ 

       କରୁ ଥିଲି ଦିନେ ଅଳି 

ବଡ଼ ହୋଇ ଆଜି ସବୁତ ଭୁଲିଛି 

       ମନ ଯାଇଛି ମଉଳି    l୧୦l

ଗାନ୍ଧିନଗର, ନବରଙ୍ଗପୁର, 

ପିନ କୋଡ଼ :764059