ରସାସୁତା ପତି ଆହେ ରଘୁପତି
 |
ରାମ ହେ ପ୍ରଣାମ ଘେନ,
ରାଜୀବ ଲୋଚନ ରାଜନ୍ୟ ଶ୍ରେଷ୍ଠ ହେ
ରୋଦସୀ ରିଷ୍ଟ ନାଶନ l
ଋଷି ପ୍ରିୟ ପ୍ରଭୁ ରତ୍ନାକର ପୂଜ୍ୟ
ରାକ୍ଷସ ଅରି ଠାକୁର,
ରବିସୁତ ରିଷ୍ଟ ଲଭଇ ବିନଷ୍ଟ ,
ନାମ ଉଚ୍ଚାରଣେ ତୋର I
ରଚନାରେ ତବ ମୁଁ ଛାର ମାନବ,
ରଚଇ ତବ ଜଣାଣ,
ରସାସୁତା ପତି ଆହେ ରଘୁପତି
ରାମ ହେ ପ୍ରଣାମ ଘେନ I
ରାଜର୍ଷି ଜନକ ଜାମାତା ପ୍ରଭୁ ହେ ,
ରମଣୀୟ ରୂପା ଜହ୍ନ,
ରଜକ ବାକ୍ୟରେ ରାଜାଦେଶ ଦେଲ
ଜାନକୀ ବନ ଗମନ I
ରମାନାଥ ଅଂଶେ ଶ୍ରେଷ୍ଠ ରଘୁ ବଂଶେ,
ରୀତି ସ୍ଥାପିଛ ସତ୍ୟର,
ରାମାୟଣ ବୀର ରଜତ କାନ୍ତ ହେ
ଆଉଥରେ ଅବତର I
ରଚି ରାମରାଜ୍ୟ ଆହେ ଶ୍ରେଷ୍ଠ ଆର୍ଯ୍ୟ
କରନ୍ତୁ ସ୍ଵଚ୍ଛ ଶାସନ,
ରାଜୀବ ଲୋଚନ ରାଜନ୍ୟ ଶ୍ରେଷ୍ଠ ହେ
ରୋଦସୀ ରିଷ୍ଟ ନାଶନ I
ରଚନା କରୁନି ରୋଦନ କରୁଛି
ରସା ବକ୍ଷରେ ଶିଶିର,
ରାବଣ ଅରି ହେ ତାରି ଅବା ମାରି,
ଇଚ୍ଛା ତବ ପୂର୍ଣ୍ଣ କର I
ଶିଶିର କୁମାର ସ୍ଵାଇଁ
ଶିକ୍ଷକ, ଗାଙ୍ଗପୁର
No comments:
Post a Comment