ଅର୍ଦ୍ଧାଙ୍ଗିନୀ

ମୁଁ ବଞ୍ଚିଛି  କି ନାହିଁ ତାକୁ ଦେଖୁ ଦେଖୁ ଜାଣି ହୁଏ 
ମୋ ଭଲ ପଣିଆ କେତେ ତା କଥାରୁ ଜାଣି ହୁଏ ।

ସେ ବୃକ୍ଷ ପରି ହେଲେ ମୁଁ ଜଳ ପରି;
ଯେଉଁ ଦିନ ମୁଁ ଶୁଖିଯିବି
ସେ ଦିନ ସେ ପତ୍ର ଝଡା ହୋଇଯିବ ,
ସଫେଦ ଓ ନିଷ୍ପ୍ରଭ ହୋଇଯିବ ତାର ରଙ୍ଗ ।

ବୁଡିଯିବ ସିନ୍ଦୁର ବିନ୍ଦୁ 
ଲିଭିଯିବ ଓଠ ର ଲାଲିମା,
ନିସ୍ତବ୍ଧ ହୋଇଯିବ ହସ୍ତ ପଦର ରାଗିଣୀ।

ଚନ୍ଦନ ତୁଳସୀ ନେବ ପ୍ରସାଧନୀ ସ୍ଥାନ 
ପରଜୀବୀ ପରି ବଞ୍ଚିବାକୁ ହେବ ତାକୁ ।

ମୋର ଅନୁପସ୍ଥିତିରେ ସେ ବି ହୋଇଯିବ -
ଏକ ଚଳନ୍ତି ଶବ,
ସୁରମ୍ୟ ପ୍ରାସାଦରେ କୋଣଠେଷା ହୋଇ କାଟିବାକୁ ହେବ ବଳକା ସମୟକୁ ।

ପର୍ବପର୍ବାଣୀ କମି ବଢିଯିବ ଓଷା ଉପବାସ 
ସହବାସ ଓ ସହାବସ୍ଥାନରୁ 
ଏକାନ୍ତ ବାସ ହେବ ଶ୍ରେୟସ୍କର ।

ଏକା ଡାଳରେ ଏକାକିନୀ ପୁଷ୍ପ ପରି 
ଝୁରୁଥିବ ସାଥୀ ପୁଷ୍ପଟିକୁ ;
ସେଥିପାଇଁ ମୁଁ ତା ପାଇଁ ଏତେ ଗରଜ,
ତାର ମୋ ପାଇଁ ଏତେ ଦରଦ ।

ଆଉ, ମୁଁ ଥାଉ ଥାଉ ତାର ଯଦି ଅବର୍ତ୍ତମାନ ହୁଏ -
ମୋ କଥା ପଚାରେ କିଏ ?
ମୋ କାହାଣୀ ହେବ ଅବର୍ଣନୀୟ, ଅକଥନୀୟ ,
ଇଟାଭାଟୀ ପରି ମୋତେ ଜଳିବାକୁ ହେବ ଭିତରେ ଭିତରେ ।

ଯା କଥା ମୁଁ ଏତେ କହୁଛି ସେ ଆଉ କେହି ନୁହେଁ -
ସେ ମୋ ଅର୍ଦ୍ଧାଙ୍ଗିନୀ, ମୁଁ ତାର ଅର୍ଦ୍ଧାଙ୍ଗ,
ଆମେ ଜାୟା ଓ ପତି - ଦମ୍ପତି -
ଜୀବନ ଯୂଦ୍ଧର ଦୁଇଜଣ ଲଢୁଆ ସଂଗ୍ରାମୀ ।

ଡଃ•ପ୍ରକାଶ ଚନ୍ଦ୍ର ପାଣିଗ୍ରାହୀ
ଦିଗପହଣ୍ଡି । ଗଞ୍ଜାମ୍ (ଓଡ଼ିଶା)


For all support related issues or to reach our team, Please check below details. 
Spread Happiness Foundation, Pune Maharashtra, Ph. +91 8668656155 | contact@spreadhappiness.co.in |  Link :  https://www.facebook.com/spreadhpy