ଯମୁନା ରାଣୀ

ଯମୁନା ରାଣୀ ଲୋ ଯମୁନା ରାଣୀ 

ଆଉ ବେଶି ତୁ ଫୁଲେଇ ହୁଅନି ll

ଦୁଇ କୂଳ ଆଉ ଲଙ୍ଘି ଯାଆନି 

ଡରିଯିବ କାଳେ କଳା କହେଁଇ ll

ସମୟ ଆସୁଛି ଆସିବେ ପାଶେ 

ଖେଳିବେ ତୋ ସାଥେ ହୋଇ ହରଷେ ll

ଭାଦ୍ର କୃଷ୍ଣପକ୍ଷ ଅଷ୍ଟମୀ ତିଥିରେ 

ଜନ୍ମିବେ ମାତା ଦେବକୀ କୋଳରେ ll

କିଟିମିଟି ସେଇ ଅନ୍ଧାର ରାତି

ମେଘ ଗର୍ଜନରେ ଥରାଏ ଛାତି ll

ସାଥେ ତାଳ ଦେଇ ବରଷା ରାଣୀ 

ଚପଳା ସାଙ୍ଗରେ ଦେଖାଏ ଠାଣି ll

ଜନମିବେ ଏକ ଶୁଭ ବେଳାରେ 

ଖୋଲିବ ଶୃଙ୍ଖଳ ଅଙ୍ଗ ସବୁରେ ll

ପ୍ରହରୀଗଣ ହୋଇ ମୂର୍ଛିତ 

ଖୋଲିଯିବ ଆପେ ଲୌହ କପାଟ ll

ପିତା ବାସୁଦେବ ନେଇ ମସ୍ତକେ 

ପଥ ଦେଖାଇବ ଚପଳା ଆଗେ ll

ରାଜା ଉଗ୍ରସେନ ହୋଇବେ ଉଭା 

ହେବେ ଆଚମ୍ବିତ ଦେଖି ସେ ଆଭା ll

ଆସି ପହଁଚିବେ ତୋହରି କୂଳେ 

ପଥ ଛାଡିଦେବୁ ଉଛୁଳା ଜଳେ ll

ଛାଡି ଆସିବେ ପିତା ନନ୍ଦପୁରେ 

ଘେନି ଆସିବେ ମହାମାୟା ସାଙ୍ଗରେ ll

ମାତାଙ୍କୁ ଦର୍ଶନ କରିବୁ ଦୂରେ 

ଏତେ ପୂଣ୍ୟ ଅଛି ତୋର ଭାଗ୍ୟରେ ll

ଅସହ୍ୟ ହେଲାଣି କଂସ ରାଜୁତି 

ଅତ୍ୟାଚାରିଙ୍କର ହୁଡ଼ିଲା ମତି ll

ଦୁଷ୍ଟ ନିବାରଣେ ଧର୍ମକୁ  ରକ୍ଷା 

ଯୁଗ ଯୁଗକୁ ଲୋ ଦେଇ ତୁ ଶିକ୍ଷା ll

ରଙ୍କନିଧି ସେଠୀ
ରଙ୍କନିଧି ସେଠୀ 
ସେକ୍ଟର-୧୪,
ଘ.ନ-ଏ/୧୨୧

ରାଉରକେଲା