ଆସନ୍ତା କାଲି ରାକ୍ଷୀ ପୂର୍ଣ୍ଣିମା । ବହୁତ ଦିନ ଆଗରୁ ପ୍ରତ୍ୟେକ ବର୍ଷ ରାକ୍ଷୀ ପଠାଇଦିଏ କୁନି । ଭାଇ ତାର ସୁଦୂର ମହାରାଷ୍ଟ୍ର ରେ ଚାକିରି କରନ୍ତି । ଥରେ ଥରେ ଭାଇ ନିଜେ ଆସି ତା ହାତରୁ ରାକ୍ଷୀ ପିନ୍ଧନ୍ତି ଓ ସୁନ୍ଦର ସୁନ୍ଦର ଡ୍ରେସ୍ ଓ ଵହି ଉପହାର ଦିଅନ୍ତି । ଏ ବର୍ଷ ...... ଭାଇ ତ ଅଛନ୍ତି ତାଙ୍କ ଘର ପାଖରେ । କିନ୍ତୁ ଘର ଲୋକ ସେଠିକୁ ଯିବା ମନା ।
କରୋନା ପାଇଁ କମ୍ପାନୀ ବନ୍ଦ ହୋଇଯାଇଥିଲା । ପ୍ରବାସୀ ଓଡ଼ିଆଭାଵେ ଓଡିଶା ସରକାର ତା ଭାଇକୁ ଆଣିଥିଲେ ସୁଦୂରମହାରାଷ୍ଟ୍ରର଼ୁ । ସେଠୁ ଆସି ଚଉଦଦିନିଆ କ୍ବାରେଣ୍ଟାଇନରେ ଗାଁ ସ୍କୁଲରେ ରହିଲା । ଚଉଦ ଦିନ ପରେ ଜଣାପଡିଲା ତା ଭାଇ କରୋନା ପଜିଟିଭ । କରୋନା ଭାଇଭଉଣୀଙ୍କ ମଧ୍ୟରେ ଅଦୃଶ୍ୟ ପାଚେରୀ ପରି ଛିଡ଼ା ହୋଇଥିଲା । ଏତେ ପାଖରେ ଥିଲେ ବି କେହି କାହାକୁ ଦେଖି ପାରୁ ନ ଥିଲେ । କୋଭିଡ୍ ପଜିଟିଭ ଥିବାରୁ ସରକାରୀ ଗାଡି ତାକୁ କୋଭିଡ୍ ହସ୍ପିଟାଲକୁ ସ୍ଥାନାନ୍ତରିତ କରୁଥିବା ଖବର ପାଇ ସ୍କୁଲ୍ ପାଖରେ ପହଞ୍ଚିଥିଲା କୁନି । ଭାଇ ଗାଡିକୁ ଗଲାଵେଳେ ହାତ ହଲାଇଥିଲା । ଧାର ଧାର ଅଶ୍ରୁ ବହିଯାଉଥିଲା କୁନିର । ବାବା ଗତେଶ୍ବରଙ୍କୁ ଗୁହାରି କରୁଥିଲା ଭାଇଙ୍କୁ ଭଲ କରି ଦେବାକୁ ।
ଘରର ସମସ୍ତଙ୍କୁ ରଖାଯାଇଥିଲା ଏକଘରିକିଆ କରି । ଘରେ ତାଙ୍କର ମରାଯାଇଥିଲା ଷ୍ଟାମ୍ଫ୍ । କାହାରି ଘରକୁ ଯାଇ ପାରୁନ ଥିଲେ ତେଣୁ । ମଝିରେ ମଝିରେ ଫୋନ୍ କରୁଥିଲା ଭାଇ । ବାପାମାଆ ସ୍ଥାଣୁ ପାଲଟି ଯାଇଥିଲେ । ଖାଉଥିଲେ ଜୀବନ ଅଛି ଵୋଲି । ଯାହା ଖାଉଥିଲେ ନ ଖାଇବା ସଙ୍ଗେ ସମାନ ।
ଗୋଟିଏ ପୁଅ ରାଜୁ ଓ ଝିଅ କୁନି । ଵାପା ଗାଁ ପ୍ରାଇମେରୀ ସ୍କୁଲ୍ ରେ ଚାକିରି କରନ୍ତି । ଏକ ପ୍ରକାର ସ୍ଵଚ୍ଛଳ ପରିବାର । ତଥାପି ଵିଶେଷ ସ୍ଵଚ୍ଛଳ ନୁହେଁ । ନିମ୍ନ ମଧ୍ୟବିତ୍ତ ପରିବାର । ଜୀଵନଯାକ ରୋଜଗାର କରି ଅପର୍ତ୍ତି ସାର ଦୁଇବଖରା ଛାତଘର ସହ ରାଜୁକୁ ପଢାଇବାରେ ସବୁ ସାରିଥିଲେ । ରାଜୁ ଵି ଅତି ସୁଧାର ପିଲା । ଅପର୍ତ୍ତିବାବୁଙ୍କର ଵାପାମାଆ ପରଲୋକ ଗମନ କରିଥିଲେ । ଝିଅଟିକୁ ପଢାଉଥିଲେ ନିଜ ଗୋଡ଼ରେ ଛିଡା କରାଇବେ ଭାବି । ଦୁଇଟି ପିଲାଙ୍କୁ ପଢାଇଲେ ଆଉ ଧନର କି ଆବଶ୍ୟକତା । ପେନ୍ ସନ୍ ରେ ଵୁଢାଵୁଢି ଚଳିଯିବୁ ।
କିନ୍ତୁ ସବୁ ଓଲଟପାଲଟ କରିଦେଲା ମହାମାରୀ ଭୁତାଣୁ । କାହା ସଂସ୍ପର୍ଶରେ ଆସି ରାଜୁର କରୋନା ପଜିଟିଭ ଵାହାରିଵା ଦିନରୁ ଖୁସି ଏକ ପ୍ରକାର ଚାଲିଯାଇଥିଲା କହିଲେ ଚଳେ । କାଲି ରାକ୍ଷୀ ପୂର୍ଣ୍ଣିମା, କୁନି ମନ ଦୁଃଖ କରି ବସିଥିଲା । ସେମାନେ ଏକଘରିକିଆ ଥିବାରୁ କାହାକୁ ନେଇ ଵି ସେ ଯାଇପାରୁ ନ ଥିଲା ।
ରାକ୍ଷୀ ପୂର୍ଣ୍ଣିମା । ଗାଧୋଇ ପାଧୋଇ ଖୁବ୍ ସକାଳୁ ରାକ୍ଷୀ ଧରି ଵାହାରିଗଲା କୁନି । ବୟସ ପନ୍ଦର । ଦୌଡ଼ି ଦୌଡ଼ି ଦୁଇଟି ଗାଁ ପାରି ହୋଇଗଲା । ତାପରେ ଥକିଗଲା କୁନି । ହାତରେ ପାଣିଵୋତଲ, ମିଠା ଓ ରାକ୍ଷୀ । ଟିକେ ବସି ପଡ଼ିଲା । ନା, ନା, ଭାଇ ହାତ ଖାଲି ଥିବ । ଆଜି ରାକ୍ଷୀ ପୂର୍ଣ୍ଣିମା କହି ଚାଲିବାକୁ ଲାଗିଲା । ଆଉ 4/5 ଟି ଗାଁ ପାରି ହେବା ପରେ ଜଣେ ଲୋକ ଅଟୋରେ ଯାଉଥିବାର ଦେଖି ହାତ ଟେକିଲା । ଛୁଆଟିଏ ଦେଖି ସେ ଅଟୋଵାଲା ନେଇଗଲା ତାକୁ ।
ସହର । ଗୋଟେ ଗୋଟେ ଗାଡି ଚାଲୁଛି ସଟ୍ ଡାଉନ୍ ଯୋଗୁଁ । କେଡେ ପ୍ରଶସ୍ତ ରାସ୍ତା !!! ଚାରିଆଡେ ମୁନିସିପାଲିଟି ଗାଡି ସାନିଟାଇଜ୍ କରୁଥିଲା । ଚାଲିଲା କୁନି । ନା, ଆଉ ହେବନି, ବହୁତ ବେଳ ହେଲାଣି । ଦୌଡିଲା ଏଥର କୁନି । ସମ୍ମୁଖରେ ଦେଖିଲା ଜିଲ୍ଲା କୋଭିଡ୍ କେୟାର ସେଣ୍ଟର । ସମ୍ଭାଳି ନ ପାରି ଦୌଡିଲା । ହଠାତ୍ ମୁନିସିପାଲିଟି ଗାଡି ସମ୍ମୁଖକୁ ଆସିଯାଇଥିଲା କୁନି । ଗାଡି ଛାତି ଓ ମୁଣ୍ଡରେ ଚାଲିଯାଇଥିଲା । ରକ୍ତାକ୍ତ ଅବସ୍ଥାରେ ପଡିଥିଲା କୁନିର ଶରୀର ।
ଦୁଇଥର ସ୍ବାବ୍ ଟେଷ୍ଟରେ ନେଗେଟିଭ୍ ଆସିବା ହେତୁ ବହୁତ ଖୁସିରେ ଗୋଡ କାଢିଥିଲା କୋଭିଡ୍ କେୟାର୍ ସେଣ୍ଟରରୁ ରାଜୁ । ଏ କ'ଣ ?? ଏତେ ଲୋକ କାହିଁକି ଗେଟ୍ ପାଖରେ । ପାଖକୁ ଯାଇ ଦେଖେ ତ ତାର ପ୍ରିୟ ସାନ ଭଉଣୀ କୁନି ଆଜି ଧୂଳିରେ ରକ୍ତାକ୍ତ ଅବସ୍ଥାରେ ପଡିଛି । ପାଖରେ ଲଥ୍ କରି ବସି ପଡ଼ିଲା ରାଜୁ । ଦେଖିଲା ହାତରେ ଧରିଛି ଜଗନ୍ନାଥ ଥିବା ରାକ୍ଷୀଟିଏ ଓ କିଛି ମିଠା । ତୁ କାହିଁକି ଆସୁଥିଲୁ ଚଣ୍ଡାଳୁଣୀ ?? ମୁଁ ତ ଭଗବାନଙ୍କୁ ଡାକୁଥିଲି ତୋ ପାଖରେ ପହଞ୍ଚିବାକୁ । ତୋତେ ବାରମ୍ଵାର ମନା କରିଥିଲି ଆସିବାକୁ । କାହିଁକି ଆଉଥିଲୁ ?? ରାକ୍ଷୀ କୁନି ହାତରୁ ନେଇ କାନ୍ଦୁଥିଲା ରାଜୁ । ହଁ, ଏଇ ତୋ ମୋ ଭିତରେ ମିଳନର ସେତୁ । କିନ୍ତୁ ଏ କଣ କଲା ??? ତୋ ଜୀ......ଵ......ନ.........
No comments:
Post a Comment