ଏଇଠି ସ୍ୱର୍ଗ ଏଇଠି ନର୍କ

 *ବାସନ୍ତୀ ଲତା ଜେନା*

ସୁନ୍ଦର ସଂସାର ରଚିଲେ ଈଶ୍ବର

      ଶାଶ୍ୱତ ପ୍ରେମରେ ଭରା

ମଣିଷକୁ କଲେ ଜୀବରେ ଉତ୍ତମ 

      ହସି ଉଠେ ଆମ ଧରା    l୧l

ଫୁଲରେ ଭରିଲେ ମଧୁର ସୁବାସ

      କୋକିଳକୁ ମିଠା ସ୍ୱର

ଜାହ୍ନବୀକୁ ଦେଲେ ଅମୃତର ସୁଧା

      ଶୋଷ ମେଣ୍ଟେ ପାନୀୟର   l୨l

ସତ୍ୟ ଦୟା କ୍ଷମା ହୃଦୟେ ରହିଲେ

      ଶ୍ରେଷ୍ଠ ମଣିଷ ତ ସେହି

ନ୍ୟାୟ ଧର୍ମ ସାଥେ ଗତି କରୁ ଥିଲେ

      ଈଶ୍ବର ଖୁସି ହୁଅଇ        l୩l

ଦିବ୍ୟ ଭାବନାରେ ବଶିଭୂତ ହେଲେ

        ଆତ୍ମା ସ୍ଵଛ ହୋଇ ଯାଏ

ନିଃସ୍ୱାର୍ଥର ସେବା ପରକୁ ନିଜର

      ମନ ମଧ୍ୟେ ସ୍ଥାନ ପାଏ    l୪l

ମନ ହୁଏ ଯଦି ସ୍ୱାର୍ଥ କବଳିତ

      ଲୋଭ ମୋହ ଘେରି ଯାଏ

ଅଧର୍ମରେ ପାଦ ସେ ଲୋକ ସ୍ଥାପଇ

      ଧର୍ମ ଲୁପ୍ତ ହୋଇ ଯାଏ    l୫l

ପାପ ପୂଣ୍ୟ କଥା ବିଚାର ନ କଲେ

      ଦୁଃଖ ଭୋଗିବାକୁ ହୁଏ

ଅମୃତର ସୁଧା ଜହର ହୁଅଇ

      ନର୍କ ଭୋଗ ଏଠି ହୁଏ    l୬l

ପରଂ ବ୍ରହ୍ମ ଶାନ୍ତି ଯେଉଁଠାରେ ହୁ'ନ୍ତି

       ଦେବ ଗୁରୁଜନ ପୂଜା

ସେହି ଠାରେ ସ୍ୱର୍ଗ ବିଦ୍ୟମାନ ହୁଏ

       ଉଡ଼ଇ ବିଜୟ ଧ୍ବଜା       l୭l

ସୁଚରିତ୍ର ହୋଇ ସଂଯମୀ ଜୀବନ

     ଯେଉଁ ବ୍ୟକ୍ତି ଆଚରଣ

ଅନ୍ୟର ଦୁଃଖରେ ଦୁଃଖି ହୋଇ ଥାଏ

      ସାର୍ଥକ ତାର ଜୀବନ      l୮l

ଘୃଣା ଅବସାଦ ଦୂର କରି ଦେଲେ

       ଦୋଷ ମୁକ୍ତ ହୁଏ ମନ

ଶୁଦ୍ଧତା ଯେଉଁଠି ପବିତ୍ର ସେଇଠି

       ଚଉବର୍ଗ ଫଳ ଦାନ     l୯l

ଏଇଠାରେ ସ୍ୱର୍ଗ ଏଇଠାରେ ନର୍କ

      ନିଜ କର୍ମ ଫଳ ମାନ

ଯେମିତି ବୁଣିବ ସେମିତି କାଟିବ

       ଏତ ବିଧିର ବିଧାନ    l୧୦l

ଗାନ୍ଧିନଗର, ପୋଷ୍ଟ /ଜିଲ୍ଲା : ନବରଙ୍ଗପୁର,