_ପ୍ରିୟରଞ୍ଜନ ସାହୁ_
ଶାରଦୀୟ ମହୀପରେ ଶେଫାଳୀର ବାସ୍ନା
ସତେ..! କାଶତଣ୍ଡୀ ସୃଷ୍ଟି କରେ 'ପାର୍ବଣ'ର ତୃଷ୍ଣା ।
ଅପୂର୍ବ ଲାଳିତ୍ୟେ ମାତ ଯୋଗମାୟା
ତା' ଦର୍ଶନେ ପୁଲକିତ ଜୀବନର କାୟା ।
ମାହେଶ୍ଵରୀ-କାତ୍ୟାୟନୀ ଉମା ବିଶ୍ଵେଶ୍ୱରୀ
ରମ୍ୟ ବଦନେ ଗଳାରେ ରତ୍ନାଢ଼୍ୟମାଳାଧାରୀ ।
ଆଶ୍ଵିନର ନବରାତ୍ରେ ଜଗତତାରିଣୀ
ନବପତ୍ରିକା କିଶଳୟେ ମହିଷାମର୍ଦିନୀ ।
ତା'ସ୍ଵାଗତ ଆୟୋଜନେ ଧରଣୀ ପ୍ରକୃତି
କୁସୁମାଞ୍ଜଳି ସଙ୍ଗେ ତୋଳିଧରେ ଛତ୍ରୀ ।
ଧରାପରେ ନାଶଯାଉ କନ୍ୟା-ଅସୂୟା
ସନ୍ତାନର କାୟା ପଛେ ସେ ବିଧିର ଛାୟା ।
ସାଥେ ବଜ୍ର-ଶପଥ ଆଣୁ ଦଶହରା
ବିଶ୍ଵଭ୍ରାତୃତ୍ଵର ସାଥେ ଶାନ୍ତିର ପସରା ।
ଜୀବମଧ୍ୟେ ହେଉ ଜ୍ଞାନଚକ୍ଷୁ ଉନ୍ମୀଳନ
ସୁସାର୍ଥକ ହୋଇଉଠୁ ମାତୃବନ୍ଦନ ।
ଜଗତ ଦେଖିବ 'ଭିନ୍ନ ରଙ୍ଗେ ଦଶହରା'
ମା'ର ଓଠେ ଯେବେ ଖେଳିବ ହସ ଧାରା ।
ରସୁଲଗଡ଼, ଭୁବନେଶ୍ୱର-751010, ଖୋର୍ଦ୍ଧା
No comments:
Post a Comment