ବିଲେଇ ବେକରେ ଘଣ୍ଟି

ଶିଶିର କୁମାର ସ୍ୱାଇଁ

ନେତା ନେଇଗଲେ ମନ୍ତ୍ରୀ ମାରିନେଲେ 

କରନ୍ତି ସର୍ବେ ଚିତ୍କାର,

ଦୁର୍ନୀତି ବିରୁଦ୍ଧେ କହିବାକୁ ପଦେ

ସାହସ ନାହିଁଁ କାହାର I

ଖଟି ଖିଆ ଅବା କି ବାବୁ ସାହେବା 

ଯିଏ ଯାର ସୁବିଧାରେ, 

ନେତା ମନ୍ତ୍ରୀଙ୍କର ହୁଅନ୍ତି ନିଜର

ଭକ୍ତିରେ ଅବା ଭୟରେ I

ଖଟିଖିଆଟିଏ ଚିନ୍ତା କରୁଥାଏ 

ପଡ଼ି ପତ୍ର ଥାଉ ଖଣ୍ଡେ,

ନେତା ମନ୍ତ୍ରୀଙ୍କର ଦୟାରୁ ଅପାର

ଚାଉଳ ମିଳୁଛି ଗଣ୍ଡେ I

ତାଙ୍କରି ବିରୁଦ୍ଧେ କହିଦେଲେ ପଦେ

ସର୍ବନାଶ ହୋଇଯିବ,

ପଡ଼ିପତ୍ର ମୋର ହୋଇବ ବେକାର

ବଞ୍ଚିବା ମୁସ୍କିଲ୍ ହେବ I

ମଧ୍ୟବିତ୍ତଟିଏ ଚାକିରି ଖଣ୍ଡିଏ

ଅଳପ ଦରମା ତାର,

କରିଲେ ବିରୋଧ ଚାକିରି ତ ଯିବ

ହେବ ଅପରାଧ ଘୋର I

ବଡ଼ ଚାକିରିଆ କାଦୁଅରେ କିଆଁ 

ପଶି ଗୋଡ଼କୁ ଧୋଇବ,

ନେତାଙ୍କର କଥା ସହେ ପାତି ମଥା

ପଦୋନ୍ନତି ତ ହୋଇବ I

ଯେ ବେସରକାରୀ କରିଛି ଚାକିରି

ନିଜ ସୁଖେ ନିଜେ ଥାଏ,

ରାଜନୀତି କଥା କରିବାକୁ ଚିନ୍ତା

ସମୟ ଜମା ନ ପାଏ I

ଶିଖିତ ବା ମୂର୍ଖ ଖୋଲିବାକୁ ମୁଖ

କେହି ଜମା ରାଜି ନୁହେଁ ,

ବିଲେଇ ବେକରେ ଘଣ୍ଟି ବାନ୍ଧିବାରେ

ସାହସ କରିବ କିଏ I

 ଗାଙ୍ଗପୁର

 ଗଞ୍ଜାମ