ନଳିନୀ ପ୍ରଭା ମିଶ୍ର
ଏ ଜୀବନ ଏକ ସଂକଳ୍ପର କ୍ଷେତ୍ର
ନୁହେଁ ଉପଭୋଗ ଲାଗି
କର୍ମର ନିମିତ୍ତ ଦୃଢ଼ ଇଚ୍ଛାଶକ୍ତି
ଉଠିଥାଏ ସଦା ଜାଗି।
ସଂକଳ୍ପିତ କର୍ମ ନୁହଁଇ ଅକର୍ମ
ଦଧିଚିଙ୍କ ଅସ୍ଥି ଦାନ
ରାମ ବନବାସ ସୂର୍ଯ୍ୟ ବଂଶ ଗାଥା
ରହିଛି ହୋଇ ମହାନ୍।
ଜଗତର ହିତେ ଜନ୍ମିତ ମାନବ
ସଂକଳ୍ପ ପଥେ ପଥିକ
ମହାପୁରୁଷର ଆଖ୍ୟା ବହି ସଦା
ରଖି ଯାଇଛନ୍ତି ଟେକ।
ସଂକଳ୍ପ ହି ଆଣେ ସମାଜେ ସଂସ୍କୃତି
ସଂସ୍କାର ବଦ୍ଧ ଜୀବନ
ମାନବିକତାକୁ କରି ଜପାମାଳି
ଜୀବନ କୁ କରେ ଧନ୍ୟ।
ଯେତେ ସତକାର୍ଯ୍ୟ ହୁଅଇ ନିଧାର୍ଯ୍ୟ
ସବୁ ସଂକଳ୍ପର ମୂଳ
ପରମ କାରଣ ମହୀ ଉଦ୍ଧାରଣ
ଯଶ ରହେ କାଳ କାଳ।
ସଂକଳ୍ପକୂ କରି ଜୀବନର ପନ୍ଥା
ଦୃଢ଼ତାକୁ କରି ଜୟ
ଅଳୀକ ଜୀବନ କ୍ଷଣିକ ସପନ
ଦିଅ ନିଜ ପରିଚୟ।
ମୁକୁନ୍ଦ ପୁର, ଆସ୍କା, ଗଞ୍ଜାମ
No comments:
Post a Comment