ଶବ ର ଶବ୍ଦ ...

ଶୂନ୍ୟସ୍ଥାନ ର ଛବିଟିଏ ପରି

ପଡିଥାଏ ନିଶ୍ଚଳ ହୋଇ...

ନା ଜାଣିପାରେ ବର୍ତ୍ତମାନର

ଅୟୁତ ଅୟୁତ ଆକାଂକ୍ଷାର ସ୍ପର୍ଶ

ନା ବୁଝିପାରେ ତା' ଉପରେ ବସୁଥିବା

କଞ୍ଚାମାଟିରେ ତିଆରି ମନସ୍ତାପ 

ଆଲୋକର କ୍ଷଣସ୍ଥାୟୀ  ଦୀପର ଉତ୍ତାପ   ।

ସେ ତ ଭାଗ ହୋଇଯାଉଥିବା 

ସମୟର ଶୂନ୍ୟସ୍ଥାନ ...ଯାହାର ଅତୀତ ଟା

ଅମାପ ସ୍ମୃତିର ଭଣ୍ଡାର ଏବଂ ବର୍ତ୍ତମାନ ଟା

କ୍ରନ୍ଦନଶୀଳ ନିର୍ଦ୍ଦିଷ୍ଟ ସଂଖ୍ୟାର ଚାଙ୍ଗୁଡ଼ି

ଆଉ ଯାହାର ଭବିଷ୍ୟତ କେବଳ 

ଦିଗନ୍ତ ବିସ୍ତାରୀ ଅନ୍ଧାର ହିଁ ଅନ୍ଧାର ...।

ଦରଦ ମାନେ ମଥାପିଟୁଥାନ୍ତି 

ଆଉ ଉତ୍ତାଳ ଲହରୀ ପରି ମାଡ଼ିଆସି 

ପୁଣି ଫେରିଯାଇ ବିଲୀନ ହୋଇଯାନ୍ତି 

ଗହଳ ପରିସ୍ଥିତିର ଜଳରେ ...।

ବଦଳୁଥାଏ ରଙ୍ଗ ବଦଳୁଥାଏ ଢଙ୍ଗ

ହେଲେ ବଦଳେନି ଶବର ସ୍ୱର ଠିକ ସେମିତି 

ଯେମିତି ଆଲୋକର ଉଜ୍ୱଳ ଜ୍ୟୋତି 

ଆଉ ଅନ୍ଧାରର ନିଃଶବ୍ଦ ପ୍ରଳାପ ...।।

ଦୀପ୍ତି ଦେବଦର୍ଶିନୀ ସୁତାର
ଓରାଳି ,ହାଟଡିହୀ,କେନ୍ଦୁଝର --758083