ସମୟ ସନନ୍ଦେ ଲେଖି ପାରୁ ତୁହି
କେତେ ଅକୁହା କାହାଣୀ
ସମ୍ପର୍କ ସହରେ ସଜାଉ ତୁ ପୁଣି
ସପ୍ତରଙ୍ଗର ବିପ୍ପଣୀ
ବୟସ ଓଢଣୀ ଟାଣି
ଏରୁଣ୍ଡି ବନ୍ଧର ଉଭୟ ପାଖେ ତୁ
ନାରୀ ରୂପେ ନାରାୟଣୀ
ନିରାଶା ମରୁରେ ମେଘ ମହ୍ଲାର ତୁ
ଝରାଇ ଅଦିନେ ପାଣି
ସାତସିଆଁ ତୋର ଦଦରା ପଣତ
ଯମକୁ ବି ପାରେ ଜିଣି
ସାଜି ତୁ ଦିଗବାରେଣୀ
ସଂସାର ସାଗର ମଝିରେ ଉଭା ତୁ
ନାରୀ ରୂପେ ନାରାୟଣୀ
ସ୍ୱାର୍ଥମେଧ ଯଜ୍ଞେ ଶେଷ ଆହୁତି ତୁ
ଭିନ୍ନ ଏକ ଯାଜ୍ଞସେନୀ
ନିୟତି ନାଟକେ ନିଆରା ଚରିତ୍ର
ଅହଲ୍ୟାରୁ ଦେବଯାନୀ
ତ୍ୟାଗର ତୁ ତରଙ୍ଗିଣୀ
ଭୂମି ଠାରୁ ଭୂମା ନାହିଁ ତୋ ଉପମା
ନାରୀ ରୂପେ ନାରାୟଣୀ
କୁଟୁମ୍ବ କୁମ୍ଭର ଅନ୍ତିମ ବୁଡ଼ ତୁ
ମୃତ୍ୟୁପୁରେ ସଞ୍ଜିବନୀ
ସଜ ସକାଳର ସୁନ୍ଦର ରୂପ ତୁ
ପ୍ରଦୋଷର ପ୍ରତିଧ୍ୱନି
କେବେ ବେଦନାର ବହ୍ନି
ଏନ୍ତୁଡ଼ି ମୋହରୁ ଜୁଇ ଲୁହ ଯାଏ
ନାରୀ ରୂପେ ନାରାୟଣୀ
ଜୀବନ ବହିର ସୂଚୀପତ୍ର ସିଏ
ଶ୍ରେଷ୍ଠ ଏକ ନିର୍ବାଚନୀ
ସବୁ ରୂପେ ସେତ ଅତି ପରିଚିତ
ଜାୟା ଜନନୀ ଭଗିନୀ
ସୃଷ୍ଟି ସ୍ଥିତି ସଂହାରିଣୀ
ଅସ୍ତିତ୍ବ ଯା ବିନା ଅନ୍ଧାର ରଜନୀ
ନାରୀ ସେତ ନାରାୟଣୀ
ରଞ୍ଜନ କୁମାର ମହାନ୍ତି
ବାଲେଶ୍ୱର
No comments:
Post a Comment