ଦେବେନ୍ଦ୍ର କୁମାର ନାଏକ
ତରଭା, ସୁବର୍ଣ୍ଣପୁର
ଛୁଆଦିନୁ ମୁଇଁ
ଖୁଜୁଛେଁ ତୋତେ
ଖୁଜି ଖୁଜି ହେଲି କାକରଛାନ,
ଇନେ ଅଛୁ ତୁଇ
ସେନେ ଅଛୁ ତୁଇ
ଦରଶନ ଲାଗି ମନ ଛନ ଛନ।।
ମାୟାର ସଁସାର
ମିଛର ଇ ସଁସାର
ଯାହିଁ ଗଲେ ସେନେ ଠଁକାଭଁଡ଼ା,
କିଏ ଯେ ନିଜର
କିଏ ଯେ ପରର
ଅସଲି ସୁନା ଲାଗସି ଲୁହାମୁଡ଼ା।।
ଲୁକେ କହେସନ
ଦେଉଲେ ବସିଛୁ
କିଏ କହେସି ଗୀର୍ଜା ମସଜିଦ୍,
ବୁଲି ବୁଲି ଅଥା
ଚାରହିଖୁତି ଯଥା
ସବୁ ଖୁଜାଖୁଜି ଲାଗେ ଅସତ।।
ରାମାୟଣ ପଢ଼ି
ଗୀତା ଭାଗବତ
ଚାଲଲି ତୁମେ ଦେଖାଲା ବାଟ,
ଗଲି ପାରାୟଣ
ମିଛ ପ୍ରବଚନ
ସବୁନେ ବସିଛେ ଅସତ ହାଟ।।
ଏତେ କଥା ଭାଲି
ସବୁ ଗଲା ଗଲି
କାଏଁ ହେଲା ଯେ କରମି ପୂଜା,
ଟଁଟି ମୁରକୁଟି
ନେତା ଭୁରକୁଟି
ଜନତାର ଟଁଟି ଗାଡ଼ିଛେ ଧୂଜା।।
** ** **
No comments:
Post a Comment